د روان ۱۳۹۵ کال د جوزا په لومړۍ ورځ د طالب ډلې مشر ملا اختر محمد منصور د پاکستان په بلوچستان ایالت کې د امریکا بې پیلوټه الوتکو له خوا په نښه شو چې په ترڅ کې يې ملا منصور او د موټر چلونکی ووژل شول.
دا لومړی ځل نه دی چې امریکا په پاکستان کې جهادي مشران په نښه کوي او د پاکستان په اصطلاح ځمکنۍ بشپړتیا تر پښو لاندې کوي، بلکې تر دې مخکې اسامه بن لادن، بیت الله محسود، حکیم الله محسود او ډیری نور مسلمانان د امریکا له خوا وژل شوي چې ملا منصور به یې وروستی هغه نه وي.
د څیړنو له مخې امریکا په نړیواله کچه هره ورځ تر ۶۰۰ زیات خلک د خپلو ملي ګټو لپاره قرباني کوي او هرڅوک یې چې ګټو ته ګواښ پیښوي، هغه چې په هره ممکن لار وي، له منځه وړي. د امریکا بهرنی سیاست په دوه بنسټونو ولاړ دی، لومړی د امریکا ملي ګټې او امنیت،  دویم د امریکا نړیواله برلاسي. هر دولت، ډله او که فرد دغو دوه ستنو ته ګواښ وي، هغه به هرو مرو له منځ وړي.
امریکا د نړۍ په هیڅ ګوټ کې کوم دایمي ملګری او دوست نه پیژني، په اسلامي نړۍ کې خو هرګز داسې څه نشته، ځکه چې اسلام او اهل یې له سره د امریکا دښمن دی. امریکا تر هغې دوستي کوي چې ګټې د هغه په وجود کې تأمین وي، کله چې ګټې د بل چا په جود کې تأمین کیږي او یا دا چې نور دی له کاره وتی وي، هغه نور له صحنې ګوښه کوي، چې ښې بېلګې يې: معمر قذافي، بن علي، حسن مبارک، جنرال مشرف، کرزی او... دي.
د سیمې چارواکي او دولتونه د امریکایې ګټو په خدمت کې دي، هر کله چې له امریکایې ګټو څخه مخ واړوي، په هماغه ورځ بیا د دوی عمر پایته رسیږي، که دولت وي یا یې نسکوروي او یا یې چارواکي بدلوي او که ډله یا هم فرد وي، نو بیا یې د مرګ کندو ته د ډرون په مټ ور ټیل وهي.
د افغانستان او پاکستان چارواکي دې دا ګمان نه کوي چې امریکا د ملا منصور او اسامه بن لادن دښمنه او ستاسو ملګرې ده، که تاسې د امریکا له مزدورۍ څخه لاس په سر شئ، نو ستاسو برخلیک هم به د معمر قذافي او حسن مبارک په څیر شي او دغه پیغام به ډرون ستاسو تر ککرۍ در ورسوي.